Staubwolgge


Home


Värs


Värs vo dr Fasnacht 2002

Die hittig Zyt isch gfäärlig, muesch di sälber schitze,
hesch nur e Schäär im Sagg, no muesch in d‘Haft go sitze.
Duss het e Schugger gfrogt: „ Was soll dää Helgeständer,
y will e Uuswys gseh, an welle Banggraub wänd er ?“ 

Dr Bischof Koch äär maint, er syg e Oberkuule,
indäm er sait, in Kirche gheere kaini Schwuule.
Das isch e Leugeli, fir uns isch s doch e klaare,
nur so kasch d’Keschte fir e Kirchehaizig spaare. 

Wenn s um Moslem goht, no maint d‘ Frau Zanolari:
„Gänd joo kai Wahlrächt, das git nur Larifari.“
Doch in aim Punggt wurde mir das sehr begriesse,
wenn si d’Schnuure mit me Schleyer miesst verschliesse. 

E luute Schrey, e Schregg, wenn mir in Spiegel luege.
Am Kerper Flägge, s’haut dr Doggter uus de Fuege.
Fasnachts – Fieber wär in dreyne Dääg verbyy,
doch s‘ handli sich um Euro – Niggel – Allergyy. 

S’Ruthli Metzler isch in Bärn am debattiere,
woo pletzlig ihre Darm foot aa demonstriere.
Denn het si s grad no gschafft, ojee,ojee,
doch an dr WC Diire stoht „sans papier“. 

Fänchel, Sellerie derzue au no e Schwarte.
Im Färnseh kocht dr Minu, denn är isch e zarte.
Fiidele vor hundert Lyt und Suppe salze,
fir ihn isch das jo nur e hocherotischs Balze. 

Das mit em FCB finde mir famos.
Au s neye Joggeli isch jetz riisegroos.
Und sythär dien sich neyschtens nur no d’Fraue,
bim Friehligs – Uusverkauf dert ihri Kepf verhaue. 

Dr Arthur Cohn dä Basler duet sich präsentiere.
Uff dr ganze Wält duet me d’Wärgg au eschtimiere.
Doch nähmti är dr Zircher Filz emool ins Zoom,
no haisst dr Titel vo däm Film „ Bihaind the Moon“. 

Dr Leyebärger zuggt und verdrillt au d’Auge,
druggt Grimasse, schlooft fascht y, de kaschs nid glaube.
Mir wisse nyt dien daas au gar nit schnalle,
villicht het är d’Hanfläde z’Basel iberfalle.