Staubwolgge


Home


Värs


Värs vo dr Fasnacht 2003

Dr Borer hän sy uus dr Botschaft uuse gschmisse
das Frollain uff dämm Helge duet en stargg vermisse.
S'isch so ne Nätte gsii, nur haig sy hiezulande,
z'letscht iim sy Botschaft halt e bizzli lätz verstande. 

Wenn's haisst im 'Blick' e Gschäfts-Kolleg vom Günter Netzer,
gieng bim Bin Laden yy und uus und seyg e Petzer
isch's ebbe graad so woor wie's haist, s'mies ebbis draa syy,
dr Schwyzer Ehremaa des Jahres haiss Belasi. 

D'Frau Calmy -Rey hängt in Davos, s'isch nit zem saage,
doo dämm 'Powell' quietschvergniegt am Hemmlikraage.
Dr Couchepin gseet's mit Schmärz und rimpft sy magisch Zingge
und alli Schwyzer dien mit iire Fäänli wingge. 

D' Parggschyybe wo mer jetze hän sin, hool's dr Gugger,
wäg iirer Rächnigskunscht s'Problem fiir unsri Schugger.
Bis die am Fryttyg g'rächnet hänn eb d'Zyt duet stimme,
isch als scho Sunntig und denn bruuchsch die Schyybe nimme. 

Syt unsre Noochber a ne Glätterkurs duet renne
und no as Fän vom 'Spinnemaa' sich duet bekenne.
Isch Gfoor er bsuech au unsri Fraue no dää Gängschter,
syg's als d'Mansarde druff oder duur's Kuchifänschter. 

Dr GC Goali Borer stoht in synner Pfanne,
S'Basler Spiel verlauft nit guet s'git e mängi Panne.
Jetzt will är ains go rauche, hed scho s'groosi dränge,
und scho hän dausig Stigg e Fiirzyg welle länge.

Mir dien jetzt alles gee yyber uns uuse wagse,
mir geen vo Baiz zu Baiz bis unsri Knoche gnaggse.
Mir hän uns rächt trainiert, dien jetzt viel besser singe,
mir wänn mit em Gigi au in dr Wirl Pool springe. 

S'isch d'Michelle Hunziker am Färnsee uns erschiine
bi iirem Aabligg hämmer gschwitzt, das saag yych iine.
Das Sexi-Glaid do draa gitt's aifach gar nyt z' knuure,
as Basler kaa me wirgglig saage, 'me gseht duure'. 

Uff s'Charivari stoot bi uns als d'Tante Röösli,
dr Vetter Christian schwöört eher uff s'Mimösli,
d'Cousine Heidi goot als d'Stubete go teschte
und mir, d'Staubwolgge finde d'Fasnacht halt am beschte.