Staubwolgge


Home


Värs


Värs vo dr Fasnacht 2005

Dää Behring striggt jetz in dr Kischte Wullesogge
Zyt hett är gnueg, är muess jo schyynt’s no lenger hogge.
As d’Sogge nit z’lang wäärde, luuge d’Wärter –Vättere
Das wär e neye Trigg zem deerte uuseglättere. 

Dr Herr Ex Richter Schubart dää duet mänggmol spugge,
dr Alex Frey hets nimme kenne aabe schlugge.
D’Frau Zanolari findet das jo au sehr scheen,
doch spugge duet die wiirgglig numme groossi Deen. 

An dr Miss-Suiss-Wahl sait e so ne Miss zer andere
Y haa my liftte loo bi aim im Deerfli Kandere.
Mach dr nyt druss, maint druff d’Kollegin Betti Heegel
S’ainzig wo ächt an miir no isch sin d’Zeecheneegel. 

An d’Ägypte Usstellig duet me uns no schigge,
doch dert passiert ain, e wiirgglig ganz e Digge.
Es zaigt e Knirps uff uns, mir kenne uns nimm reege,
„Mami lueg aa, die Mumie dien sich joo beweege.“ 

Wurdsch Sahleweidli mit em Bundesroot bespigge,
Micheline as Muetter, Moritz denn as Knächt go schigge.
Dr Schmid, dr Deiss und Merz als Buure kenntisch loobe,
no kennte Couchepin und dr Blocher as Muuni toobe. 

S’spyyrt dr Schawinski jetze s’Zittere in de Hoose,
es hett sy Liebling d’Anke letschthii bees verbloose.
Ney hett är d’Sändig“Hool dy Frau doch z’rugg“im Husche,
doch haisst zem Gligg jo SAT, dr S(änder) A(ifach) T(usche). 

Dr Busch dää maint zem Kerry vor em Affezwinger,
dää glycht dr graad uff’s Hoor, nur isch dää zimmlig jinger.
S‘ maint ain drnääbe, s‘ duet my eyri Wahl nid quääle,
yych sälber däät dä Aff wenns gieng au lieber wääle. 

Dumm und blöd und dumm und blöd und no viel dümmer,
Dumm und blöd und dumm und blöd und gar no dümmer.
Unseri Schieler sin nach Pisa nid die Beschte,
aber dient joo nie, Zircher Schugger welle teschte. 

Uff null komma fünf Promill dien si jetze d’Gränze setze,
derfsch nimm mit Alkohol yyber d’Stroosse hetze.
„Näbe de Schiine“ so duet s’Fasnacht Sujet haisse,
drum nimm no ain, drey Daag derfsch jetzte au entglaisse.