das gseet me iim vo Wyytem aa.
Denn Mensch und Tier het är sehr gärn,
und alles Böösi liggt iim färn.
Als Bundesroot, die hänn e Knall,
e soone Maa dä bruuchsch im Stall.
S Redbull wänn sii mir verbiete,
ooni das bin ich e Niete.
Mit däm Gsöff bisch voll im Saft,
s’weggt d’Läbensgaischter und git Kraft
Gits Redbull nimm, no kasch’s vergässe,
denn muess ych Viagra ässe.
Im Bläsischuelhuus z’hinderscht hinde,
kasch die dymmschte Kinder finde.
D’Sprooch versteen si nit so rächt,
und au im Rächne sin si schlächt.
D’Leehrer sin jetzt am probiere,
d’Schwyzer Kinder z’integriere.
Zmitts in dr Nacht, so um die zwai,
schlyycht aine umme ganz elai.
Är suecht sich e dunggle Egge,
paggt dert uus und duet dra schmegge.
Es gfallt iim, dass dert niemerts faucht,
wenn är in Rueh si Stumpe raucht.
Dä Bischoff us Ängland dä isch nit ganz bache,
verzellt dr ganz Daag numme saubleedi Sache.
Zum Bäte do sotti är sini Händ falte,
doch ka‘n är die rächti Hand nit dunde bhalte.
Dr Vatikan hätt‘i viel weniger Dummi
wär‘i dr Papscht nit so geege dä Gummi.
Sie, im Coop mit dääne Lupe,
am Salat gsehsch jedi Ruppe.
Und bim Fleisch muess ich grad motze,
s’duet vor luuter Tierli strotze.
My Frau maint nur: Du dumme Hagel,
dasch di Drägg am Fingernagel.
Es git so Dääg do bisch fruschtriert,
well dr Saich passiert:
Kuum hesch di Huus frisch renoviert,
hett dir e Sprayer d’Wand verziert.
Muesch du emol und het’s pressiert,
doch findsch kai WC, isch‘s passiert
Kuum isch di Kaare uffpoliert,
denn hesch en in e Baum parkiert.
Hesch di Frau lycht provoziert,
denn landet s’Waalholz guet platziert.
Im Chef si Pitbull sehr borniert,
dir iber d’Hose uriniert.
Doch statt dr Blinddarm operiert.
do hän si dir s’Bai amputiert.
Hett dii dy Frau intim rasiert.
und mit dr Klinge fascht kaschtriert.
Wenn dir au so Saich passiert,
denn wisse mr, „mir sinn laggiert“
Bi mir dehai es isch nit glooge,
do sin d’Kinder voll uf Drooge.
Dä Schingge wo mir mänggmol ässe,
kunnt vo Säu, wo Hanf dien frässe.
Das isch die beschti Medizin,
so bruche mir nimm Ritalin.
E Meersau derfsch jetzt nimm elai,
woone lo bi dir dehai.
Denn s’Tierschutzgsetz das nimmts genau,
bi Vogel, Fisch und Nager au.
My Frau die machts au diergerächt,
het nääbe mir e zwaite Hächt.
Unsri Evi Widmer Schlumpf,
hoggd richtig dief im Banggesumpf.
Em Ruedi Merz bloost sie dr Marsch
und steggd de Bangge Gäld in Arsch.
Dr Minu meint daas isch e Hit
bi däm Spiil mach ych au mit.
Wenn d’Rumäne und d’Bulgare
mit em Kaare in d’Schwyz wänn faare,
mien si zem dr Zoll passiere,
nit emol me d’Päss kopiere.
E mängge Schwyzer dä isch froo,
si Auto das isch wieder doo.
Am morge frieh wenn d’Sunne lacht,
dr Mörgeli in Laschter gracht.
Ärm und Bai kaputt, s’isch schyyter,
laider schwätzt är glych bled wyter.
Do dra merggd me denn halt glii,
s’muess e Ziircher sii.
Kuum gsund do macht dr Mörgeli
immer wieder Sörgeli.
Denn im Färnsee rieft är uss
und duet eso als käm är druss.
Do dra merggd me denn halt glii,
s’muess e Ziircher sii.
