Staubwolgge


Home


Värs


Värs vo dr Fasnacht 2010

 Ai Fuess druff, y ha s brobiert
und mi Woog isch kollabiert.
Do sait mir my Arzt ych solli,
uff d Elefantewoog im Zolli.
Statt Granggekasse zahl ych gottloob,
nur no  Schwerverkeers-Abgoob.


Wottsch du haissi Film erwärbe,
wo druff gsteent wird, mainsch si stärbe.
Gosch in Beate Uhse Shop,
doch di Boortmenee sait stopp.
Denn nääbedra duet s nit vyyl koschte,
bim Schugger uff em Claraboschte.


Dr Tiger Woods dä locht falsch yy,
si Frau schloot mit em Schleeger dryy.
und au s Berlusconi s iire,
grieggt denn e Figur an d Biire.
Folg ych nit, mach ych e Wett,
no muess ych ooni Znacht ins Bett.
 

Liebi Lyt ych muess eych saage,
unsrer Fasnacht goots an Graage.
En Astronom het prophezeyt,
ass ai Monet usegheyt
doch s Bundeshuus het dementiert,
ass dr Merz nimm existiert.

Dr Couchpin het dr Huet scho gnoo,
e rächte Schwyzer dä isch froo.
Dr Leuebärger dä sait gnabb
und jetz goot Boscht erscht richtig ab.
Dr Burkhalter, jo do stuun y,
kocht dr Kaffi wie dr Cloony.
d Schlumpf het allem Aaschyn aa,
mit iirem Coiffeur Lämpe ghaa.
Liist d Leuthard vor uss iirem Brief,
denn fliege d Gummistiifel dief.
und d Calmy Rey die wet si hett,
dehai e Minarett im Bett.
Dr Merz dä kennt denn kai Tabu,
schläggt im Gadaffi d Fiess im Nu.
Dr Murer vor em bruune Mutz,
frogt jede: Hesch mir au e Stutz.
Bevelgerigg het sich beschwärt,
die syyge s Pulver au nit wärt.
Mir dyschle gärn, und hoffe s goot,
zää Schwoobe fir ai Bundesroot.
Isch das denn unter Dach und Fach,
ischs fir uns „e rundi Sach“.

 

D Basler Schugger Hand in Hand,
steen mit em Rugge an dr Wand.
S lauft iire warme Chef  verbyy,
jo do wott kain dr erschti syy.
Drum will sich jetz au kaine bugge,
si wänn d Impfig lieber schlugge.

Das Fasnachts Gentescht Drämmli do,
het mi uff e Fahrt mitgnoo.
Nooch acht Glas Wyy und zwai Stund Tescht,
stoot s Resultat jetz ändligg fescht.
Mim Wääsen a und wägem Schlugge,
empfielt me mir e Fraue-Gugge.


Schwaissussbriich und Gliiderschmäärze,
Fiebergrämpf, Drugg uff em Häärze.
Los nomol s Aesse dur e Kopf,
und hogg dr ganz Daag uff em Topf.
Y zittere, ka nyt derfiir,
s Rauchverbot stoot vor dr Diir.


Das isch my Frau vor vyyle Joor,
mit scheene, lange blonde Hoor.
E baar Joor speeter het die Pfunzle,
graui Hoor und diefi Runzle.
Das isch nit scheen, han ych mir dänggt
und iire grad e Burka gschänggt.
 

My Frau han ych am Barfi unde,
wäg dr Burka nimme gfunde.
Denn gseen  ych si und nimm si hai
und dängg no, het die kurzi Bai.
Si rysst dr Schleyer ab im Nu:
“Ych haiss -minu, wär bisch du?“


Z Basel an mim Rhy,
gump dert jo nit dry.
Denn d Rettigsring kasch nimme finde,
scho hänggsch z Kämbs im Räche hinde.
Z Basel, z Basel,  z Basel an mim Rhy
D Stadtbildkommission,
zaigt kai Reaktion.
D Wasserlyych dert kaine steert,
well Kämbs jo nit zue Basel gheert.
Z Basel, z Basel, z Basel an mim Rhy.