Das „i Phone“ han ych letschty kauft,
doch noochhäär han mer d Hoor denn grauft.
Was soll das „Ei“ han ych mi gfroggt,
mi vaterländischs Hirn hed s bloggt.
Versuech jo nie, das muesch vergässe,
ains welle schelle und denn z frässe.
Dr Blocher findet bi dr BAZ,
fir si Schnurre gar kai Platz.
Das Fuudiblatt sait dää no glyy,
dass goot däm glatt am Aarsch verbyy.
Putzt äär Fuudi mit dr BAZ dää Dropf,
isch s Aarsch bald gscheyter als si Kopf.
Die Maitli do halb naggt im Bligg,
sin superdinn und gar nit digg.
Die Foti „Shooting“ sin nit ring,
wirdsch gschtaillt vom BH bis zum Schtring.
Und zwanzig Daag git s nit me z bisse,
sunscht würd s Papier vom Bligg denn risse.
Do letschti in dr BVB,
han ych s bim Schaffner nimme gsee.
Dää Nachtzueschlag kaa s nit verstoound
und due däm Herr uff d Zeeche stoo.
E Zueschlag het äär trotzdäm gmacht
und ych bi im Spital verwacht.
Dr Ali Hassan het s nie grafft
und numme gafft statt aimol gschafft.
e huffe het äär Driibhaft pafft
und massehaft no Droge bschafft.
Well d Macheschafft nit Tugendhaft,
sitzt äär in Haft und wird Uusgschafft.
(Achtig Ziiridytsch)
Ich haisse Roger Schawinski,
iich bi dä Bescht scho sit em Chindsgi.
Was iich mach, duen iich entscheide,
und bi so überuus bescheide.
Mini dummi Schnorre chan iich bekunde,
han iich nämmli sälber erfunde.
Es isch my Frau mit voller Gwalt,
in Georgi Clooney schwäär verknallt.
Si het mer gsait, si het e Fruscht,
denn s fääle d Hoor uff miner Bruscht.
Druff han i gsait; mir hän s doch scheen,
derfiir hesch du si uff de Zeen.
Dr Papscht dää isch am gryyble und sitzt elai im Dom,
fir was au bruchsch den aigentligg numme das Kondom.
Äär isch so loll, äär isch so loll und findets toll.
E Bischoff stylpt e Gummi an Stägge mit vyyl Muet,
äär will jo numme, dass dr Stägge nimm so klopfe duet.
Äär isch so loll, äär isch so loll und findets toll.
Dr Brueder Klaus dä fillt in, d Kondom no Kalbsbräät yy,
kocht si denn im Wasser haiss und bisst denn gnysslich dryy.
Äär isch so loll, äär isch so loll und findets toll.
Dr Kardinal dä sammlet Kondom in jeder Art,
bloost si denn mit Helium uff und macht si Himmelfaart.
Äär isch so loll, äär isch so loll und findets toll.
D Libido vom Berlusconi,
isch glyych wie die vom Nashorn Toni.
Hundert nimmt äär mitenander,
aini scheener als die ander.
Wie macht dää das, han ych mer dänggd,
wenn mer dehai scho aini länggd.
Bunga Bunga mit dr Ruby,
macht das Berlusconi Bubi.
Drey Fraue dien jetzt dryber richte,
si Stroof als Ministrant z verrichte.
Im Vatikan duets kain bedrugge,
wenn sich dr Silvio dert muess bugge.
Baseldytsch isch unsri Sprooch,
drum lueg im neye Schungge noch.
Bi Sennetunschi kasch go gnaisse,
das duet Lumpeditti haisse.
Suechsch „Ziircher“, sii ych has brobiert,
das Schimpfwort hän si zensuriert.
Dää Nano –Waan das isch veruggd,
my Tochter het gescht ain verschluggd.
Äär wanderet durch iire Darm,
dr Buuch isch blaiit und wird ganz warm,
Wo sii den Furzt ganz unverdrosse,
het si unsre Hund verschosse.