Staubwolgge


Home


Värs


Värs vo dr Fasnacht 2013

Dr Dragovic git em ains uffs Dach,
sithär wird dr Ueli nymme Wach.
Dass dää Gripendeal  kaa glinge,
muess d Heilsarmee für iin go singe.
Bim Gripen wär me jetzt scho froo,
wurd äär dä Elchtescht no bestoo.

Zucht-Sperma vom Schwoobeland,
macht Säuli grangg s isch allerhand.
Me kaa das Flaisch schyyns glyych no ässe,
wirggsch nur schweinisch und vermässe.
Das Säuli Virus  gsehsch em aa
muess dr Steinbrück au scho länger haa.

Amme scheene Mörgeli
kunnt so ne Ziircher Nörgeli.
Äär het jetzt groossi Sörgeli,
mee will en nüm dää Nörgeli.
Nur mir hän kaini Sörgeli,
wenn äär nym isch dr Mörgeli.

Dr Baumgartner im freye Fall,
fliegt Yberschall dää het e Knall.
Drumm brobier ich voller Schwung,
im säggste Stogg dr Kaschtesprung.
Statt Schall durchschloo ich s Bett und d Muur,
im Parterre schreyt ain „Ooh mon amour“.
 
Lueget emol d Blagedde aa,
do isch mee Land als Basel draa.
S Sujet „Zu mir oder zu dir“,
rieft grad uff, geent ennand ans Gschirr.
Das Basler Tabu mir sage Hösch,
und wär do inn will uns an d Wösch.

Dr Pabscht dää maint ganz kurz und knab,
hee tschöss ich gib dr Löffel ab.
 S isch nit wägem  Twittere,
wo ich so muess zittere.
Doch jede Zyschdig s isch vermässe,
muess iich die Ross-Lasagne frässe.
 
Ich fahr Velo und dängg nyt schlächts,
krieg denn e Schubf vo linggs und rächts,
Ich stopp grad no und doch hets gracht,
und ich bi im Spital verwacht.
Mir flüchte wieder zrugg uff dr Stroos,
d Fuessgänger sin so Rüggsichtsloos.
 
E Wäält-Undergangs Värs,
s isch nyt passiert, das wärs.

Mit em Smartphone kaa me Blogge,
ich due uff em Hysli hogge.
Im Facebook heissi Fraue Sammle
und mit em i Pad ummerammle,
Nachem Sex will ich kai Zigi haa,
schnapp s i-phone und lyt  dr Frau haim aa.

Dr Alex Frey isch nymme z toppe,
jetzt git äär dr Kinderschoppe.
Duet äär mit dr Balle danze,
kriege d Ziircher uff e Ranze.
Dä göttligg Fuessball duet bestäche,
dr Pabscht will iin jetzt hailig spräche.

Wenn ich gseh d Madonna singe,
muess ich sexy d Hüfte schwinge.
My Dochter duet in Ohnmacht keyye,
gseht sii dr Justin Biber schreyye.
Sehsch Vreni Schneider merggsch scho glii,
nimm s Mikrofon und läng ere d Schii.

Wenn si an dr Uni Koche,
findsch bygott kai Flaisch am Gnoche.
Als Ergänzig griegsch no Vitamin,
e Joint und Koks und Ritalin.
Und uus em Höörsaal kasch jetzt hööre,
das Wiiderkeue wurdi stööre.

Die ney Regierig sich ergänzt,
wenn dr Morin Guy an Aaläs glänzt.
Dr Eric Wäber dää isch hool,
eso fyylt äär sich aifach wool.
Dr Brutschin d Wirtschaft sehr guet kennt,
und vo ainer Baiz zer andere rennt.
Dr Karli Schwyzer als Gross-Root,
iinestächt und ummeschloot.
D Lachemaier wird grad gschasst,
well sii nymm ins Stadtbild basst.
Dr Auderset firs Rauche kämpft
und ständig vor dr Türe dämpft.
Dr Wessels vom Verkehr und Bau,
vom erschte nüt verstoot, sait d Frau.
Was wohl dr Eymaa in sich birgt,
dass är so stargg uff d Fraue wirggt.
D Gsundhait vertritt dr Conti cool,
gläbbd Pflaschter uff jedes luuti Muul.
bi dr Herzog doo halt ich dr Latz,
ha kai Verbindig zue dr BAZ.
Dr Baschi Dürr dä sait nur Hösch
und ich wäsch denn die dräggig Wösch.