Staubwolgge


Home


Värs


Värs vo dr Fasnacht 2014

Wo d Merkel iir schmaal Beggi bricht,
so dynamisch wie e Ross mit Gicht.
“Sie habe die Loipe abgekürzt
und sei von der Steinbrück gestürzt.“
Es frooge d Grieche im Verdraue,
kaa me die Brugg nit heecher baue.
 
D NSA die duet au loose,
wenn Gugge zur Attacke bloose.
E Drummle tönt wie Maschinegweer
s Piccolo wie ne Flugabweer.
E Aaschlag hän si erruiert
wo dr Böög in Ziri explodiert.

Dää Diräggder het ganz ungeniert,       
die ganzi BVB kaschtriert.
Äär schiggt Foti stargg erregt
vo däm Stigg wo jetzt sii Hirni steggt.
Au d Sexvorwyrf  blogt iin nit sehr,
äär stoot zem effentlig Verkehr.

D Tessiner die meines numme guet,
hän mit dr Burka nyt am Huet.
Mit Rassismus het das gar nyt z due,
sait ain vo dert , jetzt losed zue.
Bi uns im Tessin, mir wänn kai Mais,
fir e Burka isch s im Summer z heiss.

D BVB bringt äär in Not,
äär isch jo nur Regierigsroot.
Dr Verkehr in Basel goht K.O.
s muess d Fyyrwehr mit em Drämli koo.
Hät dr Wessels kai Kravatte aa,
wurd s Hirni au mee Suurstoff haa.

Die Amis hän e riese Waahn,
si jaage jede Talibaan.
Mit Drohne mache si nit zart,
jagd uff Kappe mit me Bart.
Prompt het e Drohne unverdrosse,
im Wald dr Santiglaus verschosse.

S Navy spinnt, mir sin verwirrt,
sin denn in Ziiri umme giirt.
Gsehn dert Fraue nur in Bluuse,
wo in Raieboggse huuse.
Spyyrsch denn kai Zugge in de Lände,
denn sait s Navy bitte wände.

Gäll blyb suuber
 E Regierigsroot uus Basel,  äär het nie gnueg könne gsee.
Und mee als äär jeh verdient hät,  wie dää vo dr BVB.
S Gäld isch uff si Konto gflosse und äär nimmt was äär kaa nää.
Het jetzt d Übersicht verloore, derfsch iim d Schuld nit gää.
 
Jä me dänggt nit was passiert, wenn so ne glehrte Maa.
Sinni Yybersicht verliert und au schyyns nümme rächne kaa.
Für uns als Volk isch das e Gruus,kai Vertraue me ins roote Huus.
Und niemer wais,wie gseht denn unsri witri Zuekunft uus.

Au uff dr Landschaft ka me gsee, dert gits e riise Flächbrand.
Jede frisst dr Ranze voll, denn Bschisse isch dert anerkannt.
Laufts in Bärn ächt au esoo, no isch die ganzi Wält nümm  froo.
Denn Esel und Gieraffe gsehsch im Zolli gnueg derfoo.

CS und au d UBS, drugge uns e Stämpel uff.
Und au d Coop Bank isch derby, macht mit Uuszyyg riese Puff.
Liebi Lyt s isch allerhand, mir sin scho gly e Schurkeland.
Usser s git no Lyt mit Aastand und e bizz Verstand.

Und au in dr BVB, händ si im Chef e Fuestritt gee.
E digge Chaare statt Gäld spaare, uus Gäldnot hätsch kai Dram me gsee.
S Anggebliemli sait zem Drämli, gsee am Horizont e Flämmli.
Drämli, Drämli, Drämli, Drämli uff di wart i nämmli.

E Regierigsroot uus Basel, äär het nie gnueg könne gsee.
Und mee als äär jeh verdient hät, wie dää vo dr BVB.
S Gäld isch uff si Konto gflosse und äär nimmt was äär kaa nää.
Gottseidank het äär das Gäld, jetzt wieder retour gää.

Gottseidank het äär das Gäld, jetzt wieder retour gää.
Woorschynligg wird das Gäld halt jetzt e andere nää.