Staubwolgge


Home


Värs


Värs vo dr Abgsaite Fasnacht 2020

Die Griene fliege jetzt im Hooch
und alli seggle hinde nooch.
Sii schwaääbe mit und ohni Ränzli,
mit Intelligänz vo Zimmerpflänzli.
Wo würdi Grien d Idee nää,
wenn s die Greta nit würd gää.

Am Määntig uff em Laufband renne,
am Zyschdig Yoga vor em Penne.
Am Mittwuch hundert Liegestütze,
am Donnschtig denn no s Velo nütze.
Am Fritig laufe s isch Programm,
denn wäg de Demos…fahrt kai Tram.

Spüürsch e Trotti in dym Schritt,
e Bruscht im Gnigg und griegsch e Tritt.
S goht alles jetzt uff d Trottoir loos,
denn s Lääbe losch suscht uff dr Stroos.
Drum mien d Räntner trotz de gfaare,
z Fuess uff d Stroos zum d Ränte spaare.

Jää wenn si will und äär nit kaa,
kaa e Frau soo Spiilzyyg haa.
Mit däm kasch s Lääbe, sehr versiesse,
doch de mueschs mit Vorsicht gniesse.
Yybertriibschs dermit, isch s bittere,
no duesch wie d Merkel zittere.

D Banane kasch vo oobe schelle,
vo unde au, hörsch ain verzelle.
Ob oobe, unde, merggsch denn glyy,
nur so passt sii ins Müüli dryy.
Die Theorie kasch grad vergässe,
e Zürcher duets dr Queerwääg frässe.

Wenn s Verkehrskonzäpt als kolabiert,
isch dr Schaade z Basel programmiert.
Und s Tram nit fahrt in unserer Stadt,
gits Verluscht und Gschäft sin platt.
Und goht dr Wessels Schuldbelaade,
ischs kai Verluscht und au kai Schaade.

Z Basel gits es isch vermässe,
e neui Baiz zum blutt go ässe.
Bevor sii off isch, macht sii zue,
doch d Gedangge löön uns nit in rue.
Denn Personal, Gescht und Kuchidopf,
sin alli Barfuess bis zum Kopf.
Ain sitzt dert und lueggt ganz gschoggt,
äär isch uff sini Juweele ghoggt.
D Noochbers Frau luegt wie ne Gaier,
bstellt denn e Wurscht mit Spiegeleier.
E anderi rieft und isst e Dööner,
Fuudiblutt isch’s doch viel schöner.
Uns wärsch jetz in dr Blinde Kueh,
no hätte dini Auge Rueh.
Nach Knigge muesch dr Rugge stregge,
d Brüscht au nääbe d Täller legge.
E alte Maa griegt kalti Hoode,
well die ligge uff em Boode.
D Servicefrau lauft, als wie schnäller,
denn d Bruscht die hängt im haisse Däller.
Dr Suppekoch de kaschs dr dängge,
bim riere duet äär s Riebli schwängge.
Wenns denn Zyt zum zahle wär,
uss wellem Ort kunnt s Gäld denn här.
Hesch gnueg vom Flaisch und wotschs Vegaan,
no gosch in Hahn zum Talibaan.

Im Queenpalascht herrscht Halli Galli,
d Meghan und Harry saage Sali.
D Queen und d Hündli sin elai,
dr Andrew het gärn Maitlibai.
Dr Charles duet sini Oore schwinge
und im Ross Camilla Haafer bringe.

Dr Franziscus sait zem Benedict,
s Zölibat das gheert in d Wieschti gschiggt.
E hailig Bimbam, het Gott uns gschänggt,
und isch nit nur, für s Brünzle dänggt.
Dr Benedict sait, du hesch e Maage,
hesch e Frau, hesch nüt me z Saage.

Dr Brexit Boris macht e Jump,
i have the Coiffeur wie dr Trump.
Das mit the Brexit, sig not amused,
i had all Night, sehr schlächt pfuust.
I love England, i love the Queen,
my correct Name is Mr.Bean.

Weisch si isch e Flamme, e Flamme
Und sii kunnt ( sii kunnt im roote Kleid)
Und si isch e Flamme, e Flamme
Und sii kunnt ( sii kunnt im roote Kleid)
Ah, mir hän uns dänggt, was sii duet mache.
ob sii d Bröötli, immer sälber duet bache.
Denn im Neu Joor doo kasch sii gsee,
wie sii e Aasprooch in dr Bäckerey duet gee.
Wär d Sommaruga kennt, dää waiss,
die Frau isch sooo richtig haiss.
Am WEF goot sii ins Gfächt,
macht dr Ueli grad zum Knächt,
denn e Cassis Sirup dringge,
im Barmelain duets stingge.
Au dr Trump isch dört vor Ort,
wääge iire kunnt dää Depp,zum Glügg nie zum Wort.
Und dr Trump het gmaint dr Düüfel kunnt im Füür
und nit im roote Glaid. Im roote Glaid
und dr Trump het gmaint, dr Düüfel kunnt im Füür
und nit im roote Glaid. Im roote Glaid.
Jää sii isch e Flamme.