Staubwolgge


Home


Värs


Värs vo dr Fasnacht 2023
 

 Dr Charles dr King mit sine Oohre,
sii dää sig schins soo geboore.
Wäg däm Buech vom Harry het äär gschwitzt,
und d Oore hets em hindere glitzt.
Ooni s Mami duet äär jetzt bekenne,
si Ross au nym Camilla z nenne.

Im freye in dr Vollmondnacht,
han ich hemigsloosi Liebi gmacht.
Wäg Instagramm het s Handy gschällt,
my Liebesnacht goht jetzt um d Wält.
Dää Vollmond Znacht, ich bi e Gloon,
isch dää chinesisch Luft-Balloon.

Die Fasnacht laufe d Bebbi voll kompaggt,
nach em Fasnachtsmotto Zämme jetzt im Taggt.
Nach Corona fyylt sich kaine me elai,
denn mir sin z Basel dehai.
Viel studiere z Basel und sii wüsse nit,
dass es unser Basel in dr Schwiiz au git.
Au gstudierti dumm wie d Nacht gits allerlai,
denn mir sin z Basel dehai.
Jede Daag wird z Basel ebbis Demonstriert,
obwohl kaine wais, was und wo passiert.
Die wo sich klääbe, löön mir klääbe und göön hai,
denn mir sin z Basel dehai.
Als glernti Fachkraft muesch di Fach verstoo,
Politigger die wäält me aifach soo.
D Regierig kocht ihr Süppli ganz elai,
denn sin z Basel dehai.
Fremdi Kulture aigne mir uns niemols aa,
well in Basel duets, alli Kulture haa.
Drum lauf umme, wie de wotsch mit allerlai,
denn mir sin z Basel dehai.
Jää mir sin z Basel dehai.

Dr Infantino het gnueg Plattform ghaa,
drumm kunnt dr näggschti Värs jetzt draa.

My Schatz die fühlt sich voll im Glügg,
gniesst ganzi Riebli grad am Stügg.
D Fründin duet das au entzügge
nimmt ganzi Gurke zum beglügge.
Emanzipierti Fraue / mir diens erklääre,
dien sich bewusst Vegan ernääre.

Hey Mann, iich nit guut räächne kaa
und drumm ich kai Ussbildig haa.
Mini Tütsch, dass musch voll verstoo,
ich kaini Arbeit kaan bykoo.
Drei Stunde Kurs, duu musch voll gaffe,
Ich jetzt neu / als Lehrer schaffe.

In dr Nouvelle Cuisine erschte Platz,
isch dää Vegani Flaischersatz.
Käfer, Schaabe und grillti Grille,
mit Määlwurm-puree dr Maage fille.
S git kai Verstopfig nur e Wabble,
well die sälber uusekrabble.

My Frau das macht mi ganz perplex
stoot nimme uff dr Bliemlisex.
Drum brobier ich voller Schwung,
am Oobe denn dr Kaschtesprung.
Ich spring und d Flugbahn isch erhellt,
denn het d Stadt, dr Strom abgstellt.


Es kunnt e glaine nätte Maa,
dää sig schyyns uss Amerika.
Hi ich brauche Informatioon,
what is the Sport from your Natioon?
Jää in dr Schwiiz doo dien mir Schwinge,
derzue no Joddle und au Singe.
S git au Wettkämpf oder soo,
für d Stiil-Note duesch e Pryys bykoo.
Ooh my God your Sport is Swingen,
tut ihr das in Clubs vollbringen.
Mir hän kai Club und so gefimmel,
Gschwingt wir unter freyem Himmel.
Zwai Manne schwinge mit viel Gschigg,
Ai Hand an Rieme und ins Gnigg.
What two Männer make soo Sachen,
wie tun die that, denn so machen.
Musgglemänner mit grossem Tritt,
mit Juttehoose off im Schritt.
Zwei Männer göhn denn rächt an d Sach
und aine leggt dr anderi Flach.
Tun denn keine Frauen swingen,
das würde mehr Erotic bringen.
Fraue dien mit Fraue schwinge,
das duet fir d Fraue au mehr bringe.
Sii dien au danze und no singe,
und derzue no d Glogge schwinge.
Wie soll den that all nur gehen,
can ich that, auch selber sehen.
Das kasch am Eidgenössisch gsee,
d Regierig wird sich d Ehr au gee.
Es schwinge dreyhundert Frau und Maa
und vierhundertduusig Bsuecher haa.
And all the People looks dort zuu
when threehundert dort swingen duu.
Jää dää amerikanisch Maa,
het Kopfkino wie dir au ghaa.
Wie würd dää d Basler Fasnacht gsee,
wells doo..Bloos-instrumänt duet gee.

Dr Alex Frey dää het jetzt Frey
sini groosse Träum sin jetzte Brey.
Dä Vogel sii dää duet mer gfalle,
äär spielt als Kind scho mit de Balle.
Dr näggschti Sieg isch im Visier,
z Diegte hinde am Grümpel-Turnier.

Alli wänn jetzt go studiere,
sälte duet denn ain brilliere.
Au d Geburteraate dien uns quääle,
d Handwärger dien de Fraue fääle.
Die Letscht Generation züügt au kai Lääbe,
statt Sex dien die, am Boode klääbe.

D Fuessball WM im Morgeland,
gsehsch alli dert im Morgegwand.
Wiehnachtsgutzi und Gliehwyy dringge
statt Bier und Chips, das duet mer stingge,
Und dr Messi griegt als Pryys ojee,
yyber d Schulter e Harem Neglischee.

Schwindel, Übelkait und no mee,
dr Schisser, Schweissussbrüch ojee,
Das kunnt bi dr Influenca vor,
und au bi Influencer Gfoor.
Klääbsch dyy an Boode, dueschs nit tschegge,
sottsch nimm so fescht am Lyym go schmegge.