Staubwolgge


Home


Värs


Värs vo dr Fasnacht 2024
 

Dr Hansli zellt scho mit Erfolg,
s Alphabet in falscher Raiefolg.
S Vreni fyylt sich au sehr frey,
bim Rächne isch e Fünf e Drey.
Luut PISA duet s viel Dummi gee,
sälbscht e Goldfisch wais noo mee.

S Glyychstelligsgsetz das däilt uns mit,
dass es z Basel zwanzig Gschlächter git.
Luut Chromosome das muesch gsee,
sotts nur Männli und nur Wyybli gee.
Drum hän mir unseri Zügnis paggt
und dr Biolehrer grad verklaggt.

Dr Donald Trump dää blondi Pilz,
benimmt sich wie ne Rummpelstilz.  
Dr Biden bekannt als «Nation Dad»,
erinneret mehr an «walking Dead».
Bi dääre Dummhait und Demänz,
nützt nit mol, künschtliggi Intelligänz.

Bruscht und Gschlächt vom menschlich Wääse,
luegsch nymm aa, das haisst neü lääse.
Die Ussdruggswyys isch doch e Fyyne,
yych lääs di Bruscht, sie lääst di Glyyne,
Mir saage eüch, es isch e Glatte,
so wirdsch au du, zur Lääse-Ratte.

D Katholike z Bayern sin perplex,
in dr Kirche macht e Päärli Sex.
Dr Bischoff klagt und macht Radau,
erscht rächt dä Sex no mittere Frau.
Äär wünscht ne jetzte s Fäägefüür,
nur Heize isch hüt ziemligg tüür.

D Frau Baume-Schneider im Bundesroot
kunnt im Departemänt in Not.
Dr „Jesus“ Jans duet sii erlööse,
si kämpfe zämme gege s Bööse.
“Schwarz Schoof  von SVP isch doof,
 iisch kenne nuur dii Schwarz-Nase Schoof“

Die Dütsche siii es isch kai Hohn,
die setze voll uff Inklusion.
Mit Handicap duesch das verdiene,
au als Doddeli oder au als Griene.
Die erschte wo si ussprobiere,
die dien Dütschland jetzt regiere.

Alderete, Diouf, Vishi,
Onyegbule, Djiga, Tushi.
Avduhallu, Séne, Kalulu,
Ndoye, Amdouni und Pululu.
Hesch die Näme in Kopf bykoo,
hän die dr FCB verloo.

Dr Zolli dää duet Jubiliere
und e huffe Tierli präsentiere.
Si stelle im neye Vogelhuus,
e ganze schreege Vogel uus.
Dää krächzt und duet au ziemligg wiete,
si mien dr Eric Wäber hiete.

2037 kasch nimm bschysse,
no muesch di Heizig uuserisse.
Wäg däm muesch nit in Panik koo,
well d Klimawärmi isch denn jo doo.
Oder due dr Darm mit Linse raize,
no kasch Vegan mit Furze haize.


Hallo Beat
Hallo Esthi
Ich bi s Esthi Käller, bim graabe bin ich gschnäller.
Mach vieli Baustell-Löcher, in Basel noch und nöcher.
Doch ich wills no toppe und dStüürezahler foppe.
S isch mini Visioon, e Baustell Creatioon.
Letz go Käller, bau no gschnäller,
ah ah ah yeah
Letz go Käller, bau no gschnäller,
ooh oh ooh ho
Letz go Käller, bau no gschnäller,
ah ah yeah yeah
Letz go Käller, bau no gschnäller,
ooh oh ooh ho
Verkehr dää due ich stööre, das grieg ich immer z hööre.
Ich due d Auto Staue, zum eure Daag versaue.
Als Single liebi Lüüt, voo Verkehr verstand ich nüüt,
doch mit mim schöne Velo, doo fahr ich pico-bello.
Letz go Käller, bau no gschnäller,
ah ah ah yeah
Letz go Käller, bau no gschnäller,
ooh oh ooh ho
Letz go Käller, bau no gschnäller,
ah ah yeah yeah
Letz go Käller, bau no gschnäller,
ooh oh ooh ho
In mim blond Köpfli, hets vieli Wassertröpfli
und es isch no s schlimme, s dien dörte Fischli schwimme.
Doch inn de Gedangge, das find ich ziemligg s grangge,
die wo iich due quääle,          die dien mi wieder Wäähle.