Staubwolgge
Gschicht
Im Joor 1981 amme Grimpelturnier vom BD hän sich e baar
Fuessball Aagfrässeni zämme gfunde.
D'Mannschaft het dert dr Name Staubwolgge griegt.
(Das muess e scheene Acker gsi sii, dass es eso gstäubt het.)
Vo dääne Kollege hän sich drey zämme doo und hän zum Plausch fir dr Verein
aafo Schnitzelbängg singe.
Si hän denn immer me dr Plausch dra griegt und hän gfunde,
mir kennte doch au an dr Fasnacht Schnitzelbänggle.
Derno hän im 1983 dr Bangg "d
Staubwolgge"
grindet.
"D'Staubwolgge duet mit iire Värs Staub uffwirble."
Si sin den offiziell bi dr "Basler Schnitzelbangg Gsellschaft BSG" byydrätte.
D'Värs hän si in dr Melodie "Ai du scheene Schnitzelbangg" gsunge und dr
Freddy
het mit em glaine Örgeli dr Refrain uusequätscht.
Anno 1984 sin die drey s'erscht mol an dr Basler Fasnacht gloffe.
Si hän Goschtym, Helge und Värs alles in
aigener Regie gmacht.
In Joor 1996 isch dr André dr Sohn vom Freddy zur Staubwolgge derzue
gschtoose
und dr Freddy, dr Hansruedi und dr André hän d Staubwolgge neu uffgmischt.
Dr André het sini erschti Fasnacht im 1997 gnosse und isch vo dr BSG
fir dr Schlussoobe als Stv. vo dr Schlussoobe Obfrau uusgwählt
worde.
Uus eme bizzeli hälfe (Technik und Regie) isch är denn im Joor 1998
als Schlussoobe Obmaa in Vorstand vo dr BSG gwäält worde.
Dr Hansruedi het sithär e versteggds Talänt entdeckt als Helgemooler
und het sini
Helge stolz als Helgebueb derfe trage und zaige.
Dr Edi Seelig alias Saifiblooddere, speeter als Edeli, het uns e anderi
Melodie empfoole
und gholfe bim Värsli korrigiere.
Äär isch im André sii Mentor gsii und het en durch d Wält vom Värslibrinzle beglaitet.
Es sin wyteri sehr scheeni Fasnächt verby gange, bis sich dr André nach 8 Joor Vorstand in dr BSG
als Schlussoobe Obmaa zrugg zoge het.
Total 9 Schlussööbe im Casino, Volggshuus und de 3 Schiff. Mit viel Härzbluet
und 2 Liveübertraagige im Telebasel (50 Joor Schorsch und 80 Joor BSG)
Dr Freddy het sich nach 20 aktive Bängglerjoor nach dr Fasnacht 2005
pensioniere loo.
Äär wird als "Ehremitglied" dr Staubwolgge erhalte blyybe.
D' Staubwolgge het dr Name bhalte um d'Tradition uffrächt z'erhalte,
was dr Freddy als letschts bi dr Staubwolgge aktivs Grindigsmitglied e tolli
Sach findet.
Ainzig "d" isch ewäg gfalle und dr Bangg haisst jetzt "Staubwolgge".
Im Lauf vom 2005 isch d'Staubwolgge nach langem
Entschaidigswääg vo dr BSG ewäg gange.
D'Staubwolgge hed s'Glygg gha, dr Andy als neys Staubwolgge Mitglied uffznää,
äär und sii Handorgele sin dr entschaidende Faktor gsii, dass mir in d VSG gange sin.
Ney laufe mir an dr Fasnacht 2006 unter dr VSG (Verainigty Schnitzelbangg
Gsellschaft).
Är berychered d'Staubwolgge mit sine namhafte Erfaarige
als Diefflieger Mitbegründer und
sim Uffundzuekaib.
Mit ere neye Melodie und digge Värs dien mir s'erscht mol d'Fasnacht unter
dr VSG erobere.
Dr Hansruedi hed an dääre Fasnacht 2006
nach 20 Joor als Bänggler (derfoo 16 bi
dr Staubwolgge) dr Rüggtritt bekannt
gee.
Äär wird als "Ehremitglied" dr Staubwolgge erhalte blyybe.
Im Jänner 2006 isch d
Homepage vo dr "Staubwolgge"
uffgschalte worde .
Nach dr Fasnacht 2010 isch dr Andy mit siner Handorgele nach 5
Fasnächt zruggdrädde.
Äär wird dr Staubwolgge in Erinnerig blyybe.
D Fasnacht 2011 effnet e neys Kapitel vo dr Staubwolgge.
Neyi Mitglieder, neyi Larve und neys Goschtym.
Ney derby am Akkordeon dr Matthias und
am Helgestägge dr Michele genannt Keule.
Im 2012 isch dr André und dr Matthias aane gsässe und hän e neyi Melodie
greiiert.
Mit em Matthias sine musikalische Fäähigkaite isch das schnäll gange.
Dr André het e Melodie träumt und het sii vorgsummt, dernoo het dr Matthias
d Note uffgschriibe, gformt mit Abschluss und d Melodie isch geboore.
Mer hän e super mega giga Fasnacht gha und glyychzitig e Abgang bi dr
VSG.
Mir hän zerscht welle "Wild go singe" damit mir d Fasnacht eso gniesse könne
wie mir wänn.
Am Fasnachtsmittwuch 2012 kurz vor Mitternacht het eber dr André an dr
Schultere paggd,
es isch "s spitzig Ryssblei" gsi und het gsait, hösch Digge mäld di bi mir
nach dr Fasnacht.
Eso hän mir im Joor 2013 e neyi Perspektive bi de "Bängg fir
Basel" gfunde.
Dert sin mir rächt harzlig empfange worde und hän iis sofort wohlgfyylt.
S Bruucht mänggmol Veränderige zem wyterchoo.
Im 2014 ischs im Helgeträäger Michel gsundhaitligg nit so guet gange und het
miese uffhöre.
Äär wird dr Staubwolgge in Erinnerig blyybe.
Spontan isch denn d Cendrine yygsprunge und isch bis hyt no bi uns als
Helgemaitli.
Eso erfyllt au d Staubwolgge si Frauequote.
Im 2015 hets denn e ganz e ney Goschtym gää.
E griene fräche Waggis mit em Staubwelggli uff dr Nase.
Im Herbscht 2016 het dr Thommy, s Amt als Obmaa vo de Bängg fir Basel abgää
an dr André.
Dr André vo dr Staubwolgge isch sithäär dr stolzi Obmaa vo de Bängg fir
Basel.
Im 2020 me kaas kuum glaube
duet uns d Regierig, d Fasnacht raube.
E Truurspiel in dr ganze Stadt,
e glaine Coronavirus macht alles platt.
Aber e Wältkulturerb kasch und derfsch nit zensiere,
d Fasnächtler diens sehr kreativ, im stille duurefiere.
Mir Bänggler hän wie allewyyl gschosse
und e Fasnacht mit Fasnächtler gnosse.
Im 2020 an dr "nit Fasnacht" hän mir im gschützte Rahme
31 Uffdritt ghaa fir Fasnächtler und hän au e Telebasel Uffdritt derfe mache
im 4.UG, imme leere Ruum nur mit Kamera und Technik Lyt.
S het e Zueschauervoting gää, wo d Staubwolgge als Sieger hervorgange isch.
Telebasel Voting Sieger 2020 "Staubwolgge" vo de Bängg fir Basel
2021 isch kai Fasnacht gsi und d Staubwolgge het pausiert.
Dr Matthias unsere Muusikus isch ney in dr Band vo de"Diefflieger"
und het im "Läggerli" 2022 mitgwirggt.
Mir sin stolz e sone guete Kinschtler bi dr Staubwolgge z haa.
Fasnacht 2023 isch e Wucht gsi.
E Joor wo mir numme gueti und sehr gueti Ufftritt gha hän,
nadyrligg het unseri Värszämmestellig derzue bydrait.
S isch aifach scheen gsi.
E baar Zahle fir d
Gschicht:
An dr Fasnacht 2024
isch d Staubwolgge
40 Joor an dr Basler Fasnacht
und es sin
Sänger: André 28. Joor am Bänggle 1997 - hyte
und
s 08. Joor
als Obmaa 2017 - hyte
Akkordeon: Matthias 14. Joor am Bänggle 2011 - hyte
Helgemaitli: Cendrine 11. Joor am Bänggle 2014 - hyte